ក្នុង​រយៈ​ពេល​៥០​ឆ្នាំ តូក្យូ​ស្គាល់​ការ​​ចាប់​​ផ្តើម​​រីក​​នៃ​​ផ្កា​សាគឹរ៉ា​ដ៏​លឿន​ជា​លើក​ទី​២

29 03 2013

ជា​ធម្មតា​នៅ​ពេល​ដែល​ចូល​​ដល់​ចុង​ខែ​បី​នេះ ពេល​ដែល​អាកាសធាតុ​ចាប់​​ផ្តើម​កើន​កំដៅ រដូវ​កាល​នៃ​ការ​រីក​របស់​ផ្កា​សាគឹកា​ក៏​បាន​ចូល​មក​ដល់​ដែរ។ ដោយ​ឡែក​នៅ​តូក្យូ​ឆ្នាំ​នេះ​ការ​រីក​នៃ​ផ្កា​សាគឹរ៉ា លឿន​ជាង​​សព្វ​ដង គឺ​ចាប់​រីក​តាំង​ពី​ថ្ងៃ​ទី​១៦​មីនា​មក​ម្ល៉េះ។ ចាប់​តាំង​ពី​មាន​កំនត់​ត្រា​នៃ​ការ​កំនត់​ថ្ងៃ​ចាប់​ផ្តើម​រីក​របស់​ផ្កា​សាគឹរ៉ា​ពី​ឆ្នាំ​១៩៥៣​មក នៅ​តូក្យូ​ការ​ចាប់​ផ្តើម​រីក​នៃ​ផ្កា​សាគឹរ៉ា​ គឺ​ដូច​ទៅ​នឹង​ឆ្នាំ​២០០២​ដែរ ដែល​រីក​លឿន​​ជាង​ឆ្នាំ​ណា​ៗ​ទៀត​ទាំង​អស់។

នៅ​តូក្យូ​គេ​កំនត់​ថ្ងៃ​នៃ​ការ​ចាប់​ផ្តើម​រីក​នៃ​ផ្កា​សាគឹរ៉ា ដោយ​ផ្អែក​ទៅ​លើ ការ​រីក​នៃ​ផ្កា​សាគឹរ៉ា​នៅ​វិហារ​សាសនា​ស៊ិនតូ Yasukuni នា​កណ្តាល​ទីក្រុង​តូក្យូ។

ការ​រីក​នៃ​ផ្កា​សាគឹរ៉ា​គឺ​មាន​រយៈ​ពេល​ត្រឹម​តែ​១​អាទិត្យ​ប៉ុណ្ណោះ។ នៅ​ចន្លោះ​ពេល​នោះ​គេ​នាំ​គ្នា​ជួប​ជុំ​មិត្ត​ភក្តិ បង​ប្អូន ក្រុម​គ្រួសារ នៅ​ក្រោម​ដើម​ផ្កា​សាគឹរ៉ា ដើម្បី​ញ៉ាំ​អាហារ​ ជជែក​គ្នា​លេង និង​ទស្សនា​​ទស្ស​នីយ​ភាព​នៃ​ផ្កា​​សាគឹរ៉ា​ដ៏​ស្រស់​បំព្រង។ ការ​ជួប​ជុំ​គ្នា​នេះ​គេ​ហៅ​ថា Hanami (Flower Viewing)។

កាល​បរិច្ឆេទ​នៃ​ការ​ចាប់​ផ្តើម​រីក​នៃ​ផ្កា​សាគឹរ៉ា​​នៅ​ឆ្នាំ​នេះ​និង​ឆ្នាំ​ទៅ
sakura 1

កាល​បរិច្ឆេទ​នៃ​ការ​ចាប់​ផ្តើម​រីក​នៃ​ផ្កា​សាគឹរ៉ា​​​គិត​ជា​មធ្យម
sakura 2

រូបភាពមួយចំនួន (ពីអាំងទែណែត)
hanami1

hanami2

OLYMPUS DIGITAL CAMERA

sakura 4

អានផងដែរ៖
The Bloom of Cherry Blossoms 2013
When do the cherry blossoms bloom?
Cherry Blossom Forecast 2013
全国お花見900景 2013
お花見特集
Japan’s cherry blossom season starts early





ហ៊ីណា​ម៉ាត់ស៊ឹរី​ (Girls’ Day)

4 03 2012

ហ៊ីណា​ម៉ាត់ស៊ឹរី​(Hinamatsuri)(ជា​ភាសា​អង់គ្លេស Doll Festival ឬ Girls’ Day) គឺ​ជា​ពិធី​បុណ្យ​មួយ​ ដែល​ប្រជាជន​ជប៉ុន​តែង​តែ​ប្រារព្ធ​នៅ​ថ្ងៃ​ទី​៣​ខែ​មីនា ​ជា​រៀង​រាល់​ឆ្នាំ។ ពិធី​នេះ​ប្រារព្ធ​សំរាប​តែ​គ្រួសារ​ណា ដែល​មាន​កូន​ស្រី​តែ​ប៉ុណ្ណោះ ហើយ​ការ​ប្រារព្ធ​នេះ​គឺ​ធ្វើ​ឡើង​ក្នុង​គោល​បំណង ដើម្បី​អោយ​កូន​ស្រី​ធំ​ធាត់​មាន​សុខភាព​ល្អ។ នៅ​ក្នុង​ពិធី​បុណ្យ​នេះ គេ​មាន​ការ​ដាក់​តាំង​នូវ​រូប​តុក្កតា​​និង​សំភារៈ​មួយ​ចំនួន។ គេ​មាន​ជំនឿ​ថា​រូប​តុក្កតា​ទាំង​នេះ​នឹង​អាច​បណ្តេញ​គ្រោះ​ចង្រៃ​ទាំង​ឡាយ​អោយ​ចេញ​ផុត​បាន។

ការ​ដាក់​តាំង​នូវ​រូប​តុក្កតា​ចែក​ចេញ​ជា​៧​ថ្នាក់៖

១. នៅ​ថ្នាក់​ទី​១​ដែល​ជា​ថ្នាក់​លើ​គេ​ ​មាន​រូប​តុក្កតា​​ចំនួន​២​ ដែល​តំនាង​អោយ​ព្រះ​ចៅ​អធិរាជ និង អធិរា​ជិនី។
២. នៅ​ថ្នាក់​ទី​២​ដែល​ជា​ថ្នាក់​បន្ទាប់ មាន​រូប​តុក្កតា​ចំនួន​ប៣​ ដែល​តំនាង​អោយ Court Ladies ចំនួន​៣​នាក់។ (ខ្មែរ?)
៣. នៅ​ថ្នាក់​ទី​៣​​ មាន​រូប​តុក្កតា​ចំនួន​៥ ដែល​តំនាង​អោយ​អ្នក​លេង​ភ្លេង​បុរស​ចំនួន​៥​នាក់។
៤. នៅ​ថ្នាក់​ទី​៤​ មាន​រូប​តុក្កតា​ចំនួន​២ ដែល​តំនាង​អោយ​រដ្ឋ​មន្ត្រី​​​ចំនួន​៣​រូប។
៥. នៅ​ថ្នាក់​ទី​៥ មាន​រូប​​តុក្កតា​ចំនួន​៣​ ដែល​តំនាង​អោយ​សាមុរ៉ៃ​ដែល​ជា​អ្នក​ការពារ។
៦. នៅ​ថ្នាក់​ទី​៦​និង​ទី​៧​ ​មាន​ដាក់​តាំង​នូវ​របស់​របរ​មួយ​ចំនួន​ដូច​ជា​រទេះ គ្រឿង​សង្ហារឹម​ជា​ដើម។





ការ​ប្រកួត​បាញ់​ធ្នូ​ Tōshiya

16 01 2012

តូស៊ីយ៉ា (Tōshiya) គឺ​ជា​ការ​ប្រកួត​បាញ់​ធ្នូ​ប្រពៃណី​មួយ ដែល​ធ្វើ​ឡើង​ជា​រៀង​រាល់​ឆ្នាំ​នៅ​ក្នុង​វត្ត​ព្រះ​ពុទ្ធ​សាសនា​សាន​យ៉ឺ​សាន​ហ្កេន​ដូ (Sanjūsangen-dō) នា​ទី​ក្រុង​ក្យូតុ។ គេ​តែង​តែ​ប្រារព្ធ​ពិធី​នេះ​នៅ​ថ្ងៃ​អាទិត្យ​ដែល​កៀក​​នឹង​ថ្ងៃ​ទី​១៥​មករា​ជាង​គេ​(ឆ្នាំ​នេះ​គឺ​ចំ​ថ្ងៃ​១៥​មករា​តែ​ម្តង)។ ឆ្នាំ​នេះ​​ដែរ​មាន​អ្នក​ចូល​រួម​ប្រមាណ​ជា​២៣០០​នាក់​ មក​ពី​ទូទាំង​ប្រទេស​ជប៉ុន ហើយ​ភាគ​ច្រើន​គឺ​ជា​អ្នក​ដែល​ឈាន​ចូល​អាយុ​ពេញ​វ៏យ​នៅ​ឆ្នាំ​នេះ។ ការ​ប្រកួត​គឺ​គេ​​ត្រូវ​​បាញ់​​ធ្នូ​អោយ​ចំ​ផ្ទាំង​ស៊ីប ដែល​មាន​មាន​អង្កត់​ផ្ចិត​ពី​កន្លះ​ម៉ែត្រ​ទៅ​មួយ​ម៉ែត្រ ក្នុង​ចំងាយ​​​៦០​ម៉ែត្រ។

ប្រវត្តិ​នេះ​ការ​ប្រកួត​នេះ​មាន​តាំង​ពី​ដើម​សតវត្ស​ទី​១៧​មក​ម្លេះ គឺ​នៅ​ក្នុង​សម័យ​អេដុ​(១៦០៣-១៨៦៨)។ នៅ​​សម័យ​​នោះ​​គេ​​ចែក​ការ​ប្រកួត​ជា​៤​ប្រភេទ​គឺ៖

ប្រភេទ​ទី​១​គឺ Hyaku-i ៖ ក្នុង​ចំនោម​ព្រួញ​១០០ អ្នក​ដែល​បាញ់​ចំ​គោល​ដៅ​បាន​ច្រើន​ជាង​គេ​គឺ​ជា​អ្នក​ឈ្នះ។
ប្រភេទទី២គឺ Sen-i ៖ ក្នុង​ចំនោម​ព្រួញ​១០០០ អ្នក​ដែល​បាញ់​ចំ​គោល​ដៅ​បាន​ច្រើន​ជាង​គេ​គឺ​ជា​អ្នក​ឈ្នះ។ នៅ​ឆ្នាំ​១៨២៧ ក្មេង​អាយុ​១១​ឆ្នាំ​ម្នាក់​ឈ្មោះ Kokura Gishichi បាន​បាញ់​ចំ​គោល​ដៅ​ចំនួន​៩៩៥។
ប្រភេទទី៣គឺ Hiyakazu ៖ ក្នុង​កំឡុង​ពេល​ថ្ងៃ(១២​ម៉ោង) អ្នក​ដែល​បាញ់​ព្រួញ​បាន​ច្រើន​ជាង​គេ​គឺ​ជា​អ្នក​ឈ្នះ។ នៅ​ឆ្នាំ​១៧៧៤ ក្មេង​អាយុ​១៣ឆ្នាំ​ម្នាក់​ឈ្មោះ Masaaki Noro ​បាញ់​​បាន​​​ចំនួន​​ ១១៧១៥​ព្រួញ ហើយ​បាន​បាញ់​ចំ​គោល​ដៅ​សឹង​តែ​ទាំង​អស់។
ប្រភេទទី៤គឺ Ōyakazu ៖ ក្នុង​២៤​ម៉ោង អ្នក​ដែល​បាញ់​ព្រួញ​បាន​ច្រើន​ជាង​គេ​គឺ​ជា​អ្នក​ឈ្នះ។ នៅ​ថ្ងៃ​ទី​២៦​មេសា​១៦៨៦ Wasa Daihachiro បាន​បាញ់​បាន​ចំនួន​១៣០៥៣​(ចំ​គោល​ដៅ​ចំនួន​៨១៣៣) បើ​គិត​ជា​មធ្យម​គឺ​៥៤៤​ព្រួញ​ក្នុង​មួយ​ម៉ោង ឬ​៩​ព្រួញ​ក្នុង​មួយ​នាទី។





សមាជិក​ក្រុម​J-Pop AKB48 & SKE48 ប្រារព្ធ​ពិធី​ឈាន​ចូល​អាយុ​ពេញ​វ័យ

9 01 2012

មិន​ខុស​ពី​ប្រជាជន​ជប៉ុន​ទូទៅ ដែល​ឈាន​ចូល​អាយុ​ពេញ​វ័យ​ទេ សមាជិក​របស់​ក្រុម​ចំរៀង​J-Pop​ដ៏​ល្បី​ល្បាញ​​ AKB48 និង SKE48 ដែល​ឈាន​ចូល​អាយុ​ពេញ​វ័យ​ ក៏​បាន​ចូល​រួម​ប្រារព្ធ​ពិធី​នេះ​ដែរ។ នៅ​ឆ្នាំ​នេះ​ មាន​សមាជិក​ចំនួន​១៩​នាក់​ដែល​ឈាន​ចូល​អាយុ​ពេញ​វ័យ ក្នុង​នោះ​១៥​នាក់​ស្ថិត​ក្នុង​ក្រុម​AKB48 និង ៤​នាក់​ទៀត​ស្ថិត​ក្នុង​ក្រុម SKE48។

សមាជិកAKB48ដែលឈានចូលអាយុពេញវ័យទាំង១៥នាក់៖
១. Itano Tomomi

២. Kasai Tomomi

៣. Kashiwagi Yuki

៤. Kitahara Rie

៥. Kobayashi Kana

៦. Maeda Atsuko

៧. Masuda Yuka

៨. Nakagawa Haruka

៩. Nakaya Sayaka

១០. Nonaka Misato

១១. Ōya Shizuka

១២. Suzuki Mariya

១៣. Takahashi Minami

១៤. Takajō Aki

១៥. Yonezawa Rumi

សមាជិកSKE48ដែលឈានចូលអាយុពេញវ័យទាំង៤នាក់៖
១. Hiramatsu Kanako

២. Matsui Rena

៣. Suda Akari

៤. Takayanagi Akane

សកម្មភាព​ប្រារព្ធ​ពិធី​ឈាន​ចូល​អាយុ​ពេញ​វ័យ​របស់​សមាជិក​ទាំង​១៩​នាក់​នៅ​វិហារ​សាសនា​ស៊ិនតូ កាន់ដា​(Kanda Shrine)៖

អានផងដែរ៖
ថ្ងៃឈានចូលអាយុពេញវ័យ (Coming of Age Day)
ជប៉ុន៖ ចំនួន​អ្នក​ឈាន​ចូល​អាយុ​ពេញ​វ័យ​កាន់​តែ​ថយ​ចុះ





ជប៉ុន៖ ចំនួន​អ្នក​ឈាន​ចូល​អាយុ​ពេញ​វ័យ​កាន់​តែ​ថយ​ចុះ

9 01 2012

នា​ប្រទេស​ជប៉ុន ថ្ងៃ​ឈាន​ចូល​អាយុ​ពេញ​វ័យ​ឆ្នាំ​នេះ​គឺ​ចំ​ថ្ងៃ​ទី​៩​ខែ​មករា​(ថ្ងៃ​ចន្ទ​នៃ​សប្តាហ៍​ទី​២​ក្នុង​ខែ​មករា)(ស្វែង​យល់​បន្ថែម​ពី​ថ្ងៃ​ឈាន​ចូល​អាយុ​ពេញ​វ័យ៖ ថ្ងៃ​ឈាន​ចូល​អាយុ​ពេញ​វ័យ (Coming of Age Day))។ នៅ​ឆ្នាំ​នេះ​ដែរ ចំនួន​អ្នក​ឈាន​ចូល​អាយុ​ពេញ​វ៏យ​បាន​ធ្លាក់​យ៉ាង​ទាប​បំផុត។ ចំនួន​អ្នក​ឈាន​ចូល​អាយុ​ពេញ​វ័យ​នៅ​ឆ្នាំ​នេះ គឺ​មាន​ចំនួន ១.២២​លាន​នាក់ (ប្រុស​៦២​ម៉ឺន​នាក់ ស្រី​៦០​ម៉ឺន​នាក់) ធៀប​នឹង​ឆ្នាំ​២០១១​គឺ​តិច​ជាង​ប្រមាណ​២​ម៉ឺន​នាក់។ ចំនួន​នេះ​បាន​ធ្លាក់​ចុះ​ពាក់​កណ្តាល បើ​ធៀប​នឹង​ឆ្នាំ​១៩៧០ ដែល​កាល​នោះ អ្នក​ឈាន​ចូល​អាយុ​ពេញ​វ័យ​មាន​ចំនួន ២.៤៦​លាន​នាក់។ ហើយ​ចំនួន​នេះ​ផង​ដែរ គឺ​​​ត្រឹម​តែ​ ០.៩៦% ប៉ុណ្ណោះ​នៃ​ចំនួន​ប្រជាជន​សរុប​របស់​ប្រទេស​ជប៉ុន។





Repost៖ ទំនៀម​ទំលាប់​ថ្ងៃ​បុណ្យ​Valentine​របស់​ជន​ជាតិ​ជប៉ុន​

14 02 2011

ថ្ងៃ​បុណ្យ​នៃ​សេចក្តី​ស្រលាញ់​អាច​ចាត់​ទុក​ជា​ថ្ងៃ​ដ៏​មាន​ន័យ​មួយ​ដែល​មនុស្ស​គ្រប់​គ្នា​អាច​បង្ហាញ​នូវ​សេចក្តី​ស្រលាញ់​របស់​ចំពោះ​គ្រួ​សារ បង​ប្អូន មិត្ត​ភក្តិ រឺ​ក៏​គូ​សង្សារ (តែ​ក៏​មិន​ត្រូវ​ធ្វើ​អោយ​លើស​ពី​ព្រំ​ដែន​នៃ​សេច​ក្តី​ស្រលាញ់​ផង​ដែរ​!!!)។​ទំនៀម​ទំលាប់​នៃ​ការ​រៀប​ចំ​ថ្ងៃ​បុណ្យ​នៃ​សេច​ក្តី​ស្រ​លាញ់​គឺ​ខុស​ៗ​គ្នា​ទៅ​តាម​ទី​កន្លែង​ផ្សេង​ៗ។​ដោយ​ឡែក សំរាប់​ជន​ជាតិ​ជប៉ុន​ក៏​មាន​ទំនៀម​ទំលាប់​ខុស​ពី​គេ​ដែរ​ដោយ​នៅ​ថ្ងៃ​១៤​កុម្ភៈ​គឺ​មាន​តែ​មនុស្ស​ស្រី​ទេ​ដែល​អាច​ជូន​សូកូឡា​ទៅ​កាន់​​មនុស្ស​​ប្រុស​។​​សូកូឡា​​ដែល​​ជូន​ទៅ​មនុស្ស​ប្រុស​មាន​ពីរ​ប្រភេទ​គឺ​Giri-Choco​(Obligation Chocolate)​និង​Honmei-Choco​(True Feeling Chocolate)។​​Giri-Choco​​គឺ​ជា​ប្រភេទ​សូកូឡា​ដែល​មនុស្ស​ស្រី​ជូន​ទៅ​កាន់​មិត្ត​រួម​ការងារ​ប្រុស ចៅ​ហ្វាយ​នាយ​ប្រុស មិត្ត​ភក្តិ​ប្រុស​រឺ​បង​ប្អូន​ប្រុស​ជា​ដើម។​ចំនែក​ឯ​Honmei-Choco​​គឺ​ជា​ប្រភេទ​សូកូឡា​សំរាប់​ជូន​ទៅ​កាន់​ស្វាមី​រឺ​គូសង្សារ។​Honmei-Choco​ភាគ​ច្រើន​គឺ​មនុស្ស​ស្រី​ជា​អ្នក​ធ្វើ​វា​ដោយ​ផ្ទាល់​ដៃ​។មួយ​​ខែ​ក្រោយ​ថ្ងៃ​បុណ្យ​នៃ​សេចក្តី​ស្រលាញ់​មក​គឺ​​នៅ​ថ្ងៃ​ទី​១៤​ខែ​មីនា​(គេ​ហៅ​ថា​White Day)​គឺ​ជា​ភារ​កិច្ច​របស់​មនុស្ស​ប្រុស​ម្តង​ដែល​ត្រូវ​ជូន​កាដូ​ទៅ​កាន់​មនុស្ស​ស្រី​ណា​ដែល​បាន​ជូន​សូកូឡា​មក​គេ​កាល​ពី​ថ្ងៃ​១៤​កុម្ភៈ​វិញ​។​របស់​ដែល​សង​ត្រលប់​ទៅ​វិញ​អាច​ជា​សូកូឡា​រឺ​ក៏​អាច​ជា​កាដូ​ផ្សេង​ៗ។
នៅ​ប្រទេស​កូរ៉េ​ខាង​ត្បូង​ក៏​មាន​ទំនៀម​ទំលាប់​បែប​នេះ​ដែរ តែ​ចំនែក​នៅ​តៃវ៉ាន់​គឺ​ផ្ទុយ​ពីនេះ​ដោយ​មនុស្ស​ប្រុស​ជា​អ្នក​ជូន​សូកូឡា​នៅ​ថ្ងៃ​១៤​កុម្ភៈ​ឯ​មនុស្ស​ស្រី​ជា​អ្នក​សង​វិញ​នៅ​ថ្ងៃ​១៤​មីនា។


សូកូឡា​ដែល​ខ្ញុំ​បាន​ទទួល​ពី​មិត្ត​រួម​ថ្នាក់ (Thank you ディラ :D)

ប្រកាសដើម៖ ទំនៀម​ទំលាប់​ថ្ងៃ​បុណ្យ​Valentine​របស់​ជន​ជាតិ​ជប៉ុន​





ថ្ងៃឈានចូលអាយុពេញវ័យ (Coming of Age Day)

13 01 2011

Coming of Age Day (成人の日) ​គឺ​ជា​ថ្ងៃ​បុណ្យ​ជាតិ​មួយ​នៅ​ប្រទេស​ជប៉ុន។​គេ​​ប្រារព្ធ​ពិធី​នេះ​ឡើង​ដើម្បី​អបអរ​ដល់​អ្នក​ដែល​ឈាន​ចូល​ដល់​អាយុ​ពេញ​វ័យ​(២០ឆ្នាំ) មាន​​ន័យ​ថា​គេ​អាច​មាន​សិទ្ធិ​ធ្វើ​អ្វីៗ​បាន​ដូច​ជា​មាន​សិទ្ធិ​បោះ​ឆ្នោត ជក់​បារី និង​ផឹក​គ្រឿង​ស្រវឹង​ជា​ដើម។
ចាប់​ពី​ឆ្នាំ​១៩៤៨​មក គេ​តែង​ប្រារព្ធ​វា​ជា​រៀង​រាល់​ឆ្នាំ​នៅ​ថ្ងៃ​ទី​១៥​មករា។​ប៉ុន្តែ​ដោយ​យោង​ទៅ​តាម​ប្រព័ន្ធ​Happy Monday System​ចាប់​ពី​ឆ្នាំ​២០០០​មក គេ​ក៏​បាន​ប្រារព្ធ​វា​នៅ​ថ្ងៃ​ចន្ទ​នៃ​សប្តាហ៍​ទី​២​ក្នុង​ខែ​មករា​វិញ។

Coming of Age Day នៅ​ឆ្នាំ​២០១១​នេះ​ប្រជាជន​ជប៉ុន​ដែល​ឈាន​ដល់​អាយុពេញ​វ័យ​គឹ​មាន​ចំនួន​១២៤០០០០នាក់​​(ប្រុស​៦៣០០០០​និង​ស្រី​៦១០០០០នាក់)។​ចំនួន​នេះ​គឺ​តិច​ជាង​កាល​ពី​ឆ្នាំ​២០១០​ចំនួន​៣០០០០នាក់ ហើយ​វា​ក៏​ជា​លើក​ទី​មួយ​ដែរ​ដែល​ចំនួន​ប្រជាជន​ជប៉ុន​ឈាន​ចូល​អាយុ​ពេញ​វ័យ​មាន​ចំនួន​តិច​ជាង​១%​ផង​នៃ​ចំនួន​ប្រជាជន​សរុប​១២៧​លាន​នាក់​។



***Happy Monday System​ ត្រូវ​បាន​បង្កើត​ឡើង​នៅ​ឆ្នាំ​១៩៩៨​និង​ឆ្នាំ​២០០១​ដែល​តំរូវ​អោយ​រំកិល​ថ្ងៃ​ឈប់​មួយ​ចំនួន​ទៅ​ដាក់​នៅ​ថ្ងៃ​ចន្ទ​ដើម្បី​អោយ​បាន​ឈប់​សំរាក​បី​ថ្ងៃ​ជាប់​គ្នា​គឺ​ថ្ងៃ​សៅរ៏​ អាទិត្យ​ និង​ចន្ទ។
ថ្ងៃឈប់សំរាកចំនួនបីទៀតដែលត្រូវបានរំកិលទៅថ្ងៃចន្ទ៖
Marine Day រំកិលទៅថ្ងៃចន្ទសប្តាហ៍ទី៣នៃខែកក្កដា
Respect for the Aged Day រំកិលទៅថ្ងៃចន្ទសប្តាហ៍ទី៣នៃខែកញ្ញា
Health and Sports Day រំកិលទៅថ្ងៃចន្ទសប្តាហ៍ទី២នៃខែតុលា

អានផងដែរ៖
ប្រទេស​​ចំនួន​​២០​​ដែល​​មាន​​កំនើន​​ប្រជាជន​​​តាម​​ធម្មជាតិ​អវិជ្ជ​មាន​​ឬ​​សូន្យ
កូនម្នាក់១៣០០០យ៉េន/ខែ








%d bloggers like this: