ជាមួយនឹងកំពស់៦៣៤ម៉ែត្រ បើនិយាយក្នុងន័យសំនង់តួប៉ម Tokyo Skytree ត្រូវបានចាត់ទុកជាតួប៉មដែលខ្ពស់ជាងគេក្នុងលោក តែបើនិយាយពីសំនង់ទូទៅ វាស្ថិតនៅក្នុងចំនាត់ថ្នាក់ទី២បន្ទាប់ពីសំនង់អគារ Burj Khalifa ដែលស្ថិតនៅ Dubai ។
ការកសាង Tokyo Skytree ត្រូវចំនាយអស់រយៈពេល៣ឆ្នាំកន្លះ។ សំនង់នេះត្រូវបានសាងសង់ឡើងដើម្បីបំរើការជាអង់តែនជំនួស Tokyo Tower ខណៈដែល Tokyo Tower ត្រូវបានហ៊ុំព័ទ្ធដោយអគារខ្ពស់ៗជាច្រើន (Tokyo Tower ត្រូវបានសាងសង់ឡើងក្នុងឆ្នាំ១៩៥៨ មានកំពស់៣៣៣ម៉ែត្រ)។ មួយវិញទៀត Tokyo Skytree នឹងបំរើជាទីកន្លែងកំសាន្ត ជាពិសេសគឺការឡើង Tokyo Skytree ដើម្បីទស្សនាទស្សនីយភាពនៃទីក្រុងតូក្យូ។
កន្លែងឡើងដើម្បីទស្សនាទីក្រុងតូក្យូមានពីរដំនាក់ ទី១គឺស្ថិតនៅកំពស់៣៥០ម៉ែត្រ (អាចផ្ទុកមនុស្សបាន២០០០នាក់) និងទី២ស្ថិតនៅកំពស់៤៥០ម៉ែត្រ (អាចផ្ទុកមនុស្សបាន៩០០នាក់)។ សំនង់នេះបានចាប់បើកហើយចាប់ពីថ្ងៃទី២២ឧសភា២០១២នេះ។ តាមការប៉ាន់ស្មាននៅថ្ងៃដំបូងនេះនឹងអាចមានមកទស្សនា Tokyo Skytree ប្រមាណ២០០០០០នាក់។ ហេតុដូច្នេះហើយបានជាក្រុមហ៊ុនចាត់លក់តែសំបុត្រកក់ឡើងទស្សនាមុនប៉ុណ្ណោះ រហូតដល់ថ្ងៃទី១០ខែកក្កដាទើបចាប់បើកអោយមានលក់សំបុត្រតាមថ្ងៃវិញ។ សំបុត្រកក់នេះក្នុងមួយថ្ងៃៗគឺមានលក់ត្រឹមតែ៨០០០សំបុត្រប៉ុណ្ណោះ។
តំលៃសំបុត្រឡើងទស្សនាសំរាប់មនុស្សធំទូទៅគឺ៖
កំពស់៣៥០ម៉ែត្រ៖ មានតំលៃ២០០០យ៉េន(ប្រហែល២៥ដុល្លារអាមេរិក) និង២៥០០យ៉េន(ប្រហែល៣១ដុល្លារអាមេរិក)សំរាប់សំបុត្រកក់មុន។
កំពស់៤៥០ម៉ែត្រ៖ បន្ថែមពីលើតំលៃកំពស់៣៥០ម៉ែត្រ ចំនួន១០០០យ៉េន(ប្រហែល១២ដុល្លារអាមេរិក)។
***អត្ថន័យនៃការសាងសង់កំពស់៦៣៤ម៉ែត្រ៖ ៦៣៤=Musashi(6=Mu, 3=Sa, 4=Shi)។ Musashi ជាឈ្មោះនៃខេត្តមួយនាសម័យអតីកាល ដែលបច្ចុប្បន្ននេះជាផ្នែកមួយនៃខេត្តសៃតាម៉ា ខេត្តកាណាហ្កាវ៉ា និងក្រុងតូក្យូកន្លែងដែល Tokyo Skytree ត្រូវបានសាងសង់ឡើង។
***ឈ្មោះ Tokyo Skytree ត្រូវបានជ្រើសរើសតាមរយៈការបោះឆ្នោតជាសកលទូទាំងប្រទេសចេញពីឈ្មោះចំនួន៦គឺ
១. Tokyo Edo Tower
២. Tokyo Skytree
៣. Mirai Tree
៤. Yumemi Yagura
៥. Rising East Tower
៦. Rising Tower
អានផងដែរ៖
Tokyo Skytree
Skytree is set to open Tuesday
Press given preview of Tokyo Sky Tree Town
Tokyo Sky Tree opener looms large
Tokyo Skytree Homepage
កំនត់ហេតុខ្ញុំ 
មតិថ្មីៗ